Alte Lieder

 1.
Mer sötted mit der SGA
i d' Luschtmühli ue
alls isch parat und automatisch
gönd au d'Töre zue
De Bahnhofvorstand drockt sin Chnopf
und lueget denn ganz blöd,
denn s'geht nur en chline Rock
aber fahre tuets no nöd 

2.
Zerscht  stigt de Lokifüehrer us
und lueget d'Loki a
De Kondiktör chont gär nod drus
de Vorstand lauft rot a
De Lokifüehrer tippt an Chopf
Schnufet  tüf und seit:
I glaube mer isch weleweg
de Hauptschütz usekeit. 

3.
Als zweite red't de Kondiktör
de Vorstand lueget no
de Kondiktör seit: Jetz isch mer
en Blitzgedanke cho
Es war doch sicher gär kä Sach
ond i wäss erscht no wie,
mer chläbet mit eme Chläberli
de Chnopf vom Schütz wieder ie! 

4.
Noch föf Minute geht's en Rock
doch s'stoht denn wieder Still,
d'Fahrgäscht verlüred fasch d'Geduld
was z'vill isch das isch z'vill
Uf eimol fahrt denn s'Bähnli doch
und s'fahrt denn erscht no recht
Schinbar isch de Chläbertrick
vom Kondiktör nod schlecht.

 5.
Jetz fahred mer mit der SGA
gäge s'Appezellerland
und mer bewunderet  jedesmol
em Kondiktör sin Stand
Mer sönd zwor au scho guet träniert
und lueget  au wenn's goht
dass üs nöd bim nöchschte Rank
vom Bänkli abe schloht.
 
6.
Zwor wenn du am Fenschter hocksch
keisch sicher nöd vom Bank
doch es isch en andri Gfohr
wo chont  bi jedem Rank.
Bi jedem Rank get's halt en Rock
es chlepft, — du weisch au was
es isch jo nor din arme Chopf
wo gschlage het a s'Glas

 7.
Doch met de Zit, do gwöhnt  me sich
jetz isch es halt eso
mer händ jo mit der SGA,
bis hüt  kei Schade gno.
Mer  fahred mit  de SGA
es isch halt doch ganz  glatt,
am Morge i d'Luschtmühli ue 
and z'Obed zrogg i d'Stadt. ?

 
René Diem (ca. 1965)

1.
Chunsch em Morge du i d'Firma ie
und bisch no ganz wohl dra,
doch schaffsch du nöd im Laber obe
fangt's Drama sofort a
Du wotsch i'd Garderobe ie
doch sönd scho e paar döt,
du schöttlesch no de Chopf und denksch:
Das werd mer langsam z’blöd. 

Refrain:
D'Garderobe isch scho lang viel z'chli
doch es müend immer meh Chäschte dri,
Wenn me chönnt, wör me uf d'Chäschte ue
no e Reihe Chäschte tue! 

2.
Du luegsch jetz zerscht em Rummel zue,
entdecksch denn zmol en Schpalt
denn nensch du d'Elleböge vöre
und versuechsch es jetz mit Gwalt
Du peilsch blitzschnell din Chaschte a
tuesch en uf i aller Rueh,
doch dä vom Chaschte näbedra
schloht en wieder zue. 

Refrain: D'Garderobe isch.....

3.
Das passiert so jede Tag
du hesch di scho dra gwöhnt
Du regsch di praktisch nümme uf
wenn's der uf Zeche schtönd
Der isch es scho sit langem klar,
das besseret  sicher  nie,
denn die wo d'Chäschte ine schtelled
müend halt nie döt ie!  

Refrain: D'Garderobe isch.....


René Diem (ca. 1963)